कुन उमेरको मान्छेले गर्छ ‘यौन दुराचार’ ?

दिलशोभा भन्छिन्- ६५ कटेको मान्छेसँग कल्पना गर्न सकिँदैन

२० फागुन, काठमाडौं । ‘यौन दुराचार’को आरोप लागेकी दिलशोभा श्रेष्ठको आमाघरमा अहिले पनि २९ जना वृद्धवृद्धाहरु आश्रय लिएर बसिरहेका छन् । अनलाइखबरकर्मी त्यहाँ पुग्दा उनीहरु छतमा घाम तापेर बसिरहेका थिए । कोही कोठामा धानधुन गरिरहेका थिए ।

आमा घरमा रहेका ३७ बालबालिकालाई सरकारले उठाएर लगे पनि बयस्कहरुलाई अहिलेसम्म छोएको छैन । आखिर कस्तो उमेर समूहका मानिस बस्दारहेछन् दिलशोभाको आमाघरमा ? ‘यौन दुराचार’को गम्भीर अभियोग लागेकी दिलशोभालाई हामीले उनको आश्रममा रहेका आश्रितहरुको उमेर समूहबारे जानकारी लिने प्रयास गर्‍यौं ।

‘अहिले मसँग २९ जना बाबा-आमाहरु हुनुहुन्छ, यीमध्ये दुईजना बाबा हुनुहुन्छ भने २७ जना आमा हुनुहुन्छ’ दिलशोभाले अनलाइनखबरसँग भनिन्- ‘यीमध्ये चारजना बोली नआउने हुनुहुन्छ, दुईजनाले आँखा देख्नुहुन्न ।’

बाबा-आमाहरुको उमेर चाँहि कति कति छ ? अनलाइनखबरको प्रश्नमा दिलशोभाले भनिन्-’कम उमेरका ६५ वर्षका छन्, बढी उमेरका ९५ वर्षका छन् ।’

केटाकेटी चाँहि कति-कति वर्षका थिए ? दोस्रो प्रश्नमा उनले भनिन्- ‘घटीमा भर्खरै जन्मेका देखि बढीमा १२-१३ वर्षका थिए । त्यसमा पनि बच्चीहरुलाई यहाँ माथ्लो तलामा मसँगै सुताउँथें ।’

तपाईको आमाघरमा जवान मान्छे कोही थिएन त ? उनले भनिन्- ‘जवान भनेकै मलाई यस्तो आरोप लगाउने संगीता तामाङ (आनी) र अप्सरा गुरुङमात्रै हन् । उनीहरुलाई मैले त्यस्तो काममा पठाएको भए उनैलाई सोधे हुन्छ, ६५ कटेका आमाहरुलाई कसैले त्यस्तो कल्पना गर्न सक्ला ? कसले कल्पना गर्नसक्छ, यस्ता मान्छेबाट यौन दुराचार भयो भन्ने ?’

दिलशोभाले थपिन्- ‘पानीमुनि गएर भए पनि पत्ता लगाउनुपर्‍यो, मबाट त्यस्तो यौन दुराचार भएको छ भने ।’

यौनविज्ञ भन्छन्-उमेरले छेक्दैन

यौन मनोविज्ञासम्बन्धी विज्ञ मानिने सभासद डा. सुवोध पोखरेल भने पाको उमेरका महिला हुँदैमा उनीहरुबाट यस्तो कार्य भएन भनेर ठोकुवा गर्न नसकिने बताउँछन् ।

यस्तो पाको उमेरका महिला वा पुरुषमाथि त्यस्तो आशंका गर्न सुहाउँछ ? अनलाइनखबरको प्रश्नमा डा. पोखरेलले भने- ‘विशेषगरी रजस्वला रोकिने उमेर भएपछि महिलाहरुमा यौन चाहना हुँदैन । तर, भारतमा कोठी सञ्चालन गरेर बस्नेहरु यस्तै पाको उमेरका महिलाहरु हुने गरेका छन् । त्यसैले यस्तो घटनामा छानविनपछि मात्रै केही भन्न सकिन्छ ।’

पुरुषहरुमा भने जुनसुकै पाको उमेरमा पनि यौन चाहना रहने डा. पोखरेलले बताए । त्यस्तै चाहना नभए पनि यौनकर्मी महिलाहरु बाध्यताले यस्तो कार्यमा लाग्ने उनले बताए । ‘तर, यौन दुराचार भनेको कुनै बलात्कार वा संभोगलाई नै जनाउँदैन, अर्को पक्षलाई बासनात्मक नजरले हुर्ने कार्यलाई यौन दुराचार भनिन्छ’ डा. पोखरेलले भने- ‘यौन दुराचार भन्नाले यौनकार्य नै भन्ने नभएर आशयलाई बुझिन्छ ।’